رحلة العمر للشاعر محمد مبروك من الفوار والحدة من اجمل القصائد التي قيلت في الرحلة وهي تلخص بمرارة رحلة عمر الشاعر الذي اكتشف انه يغرد خارج السرب ولكنه مع ذلك يضل متشبثا بمسار تخيره بنفسه ...
محمد مبروك : عزي في العمر
عزي في العمر عديته رحيل ** غير الناس ما تدري عليا
وطاب الكتف من هز الثقيل ** وشد الحبل طيبلي ايديا
عزي في العمر عديته شدايد ** ياسر كاثرة كانك تعد
دخلتا برور وقطعت الحمايد **رقيت الصبر لن صبري نفد
وياماريت من ناقص وزايد **وعفت لقم في عقاب الزرد
وعندي طبع ما نرقع البايد** جربناه ما حبش يشد
الملقة عار وتدير الغدايد **غير الله ما ثمة سند
وعشته جيل دبار المكايد **يشهد الظلم والحق انجحد
سلاحة خبث وحباله مصايب ** واللي طاح وتوله العمد
هذا دام هزوله جرايد **والاخر بسكاكن يمد
لن الدم يتبزع بدايد **حتى كان مادارش السية
حليل الطاح في قرب الردايد ** وين الذيب دايرله ثنية
وهكة العمر عديته رحيل **غير الناس ما تدري عليا
***
فات العمر عديته نجول **وضاع الوقت في حزم السباط
وريت وريت غير خايف نقول** نخاف نقول يلحقني الكلاط
اني مادريت قالولي سبول **قلت سبول في عقاب اللقاط
موافق طول ماعندي حلول ** سكاتي خير ما يبدا عياط
قلت القمح قالولي الفول **قلت الفول كثرلي ....
وكبرت كلمتي جابوا عدول **وصححوا عليا صحاح الغلاط
بصمت ببصمتي وصبعي خجول** وحبلي وحل من بعد الرباط
وقلت الغير تو يفهم القول **صحيح فهم وكلاني الكلاط
وريت العرض في جهة الطول ** وريت الطول في حل القضية
وريت مباركة جابت بلول **وحلفوا مباركة قالوا صبية
عزي في العمر عديته رحيل ** غير الناس ماتدري عليا
***
تعدى العمر عديته نشوف **نجي نشوف نسكر الفم
وريت الذيب صاحبلي الخروف ** وقال الذيب تنرعى الغنم
وقال نحبها تمشي صفوف **وديمة مسقمة وكيف السقم
وكانها خايفة نجبد الصوف ** وفوق ظهورها يطق الجلم
وجاب كتاب تيقري حروف** وقال تعلموا هاهي القيم
وقال طبيعتي نسخف سخوف ** غير هوايتي نسيل الدم
وعندي ناب مزاق الدفوف ** نداوي بيه من باع السقم
قاله عارف طبعك سخوف ** اخطى نتافتي وهز اللي ثم
وريت وريت والشايف يشوف ** تخاف نقولها تدخن عليا
وريت الناس من فوق الهفوف **وباقي مواصلة في نفس الثنية
وهكة العمر عديتة رحيل **غير الناس ما تدري عليا
***
فات العمر عديته غريب **وطالت غربتي بلاش رجوع
وكل نهار ينزاد النحيب ** علي نباع يا ريته بيوع
كان بيع وتعبى الجيب ** نقول السوق عدالي السلوع
منينة بيع من نوع الغريب ** طلبقنا الربح وسكبنا الدموع
ولاش الدمع نندبلك نديب ** ملي تغيب حتى للطلوع
ندبنا عمر وبكينا نصيب ** وزاد البكي علمنا الخنوع
حسبي الله والله الحسيب ** من امة ساجدة بلاش خشوع
تفشى المرض وانشل الطبيب ** وقالو مات في دار التكية
وحسب اللي قالي وموش غريب ** دمه راح للخارج هدية
عزي في العمر عديته رحيل ** غير الناس ما تدري عليا
***
هكة العمر عديتة نهوم *** ناسي جمعتي وناسي العيد
وناسي سبحتي وناسي الصوم ** وحلمي هزني رماني بعيد
نحلم رحلتي يمكن تدوم ** من الرباط ل ارض الصعيد
وعل بيروت واتاني الخطوم ** وللعراق يا ارض الصهيد
لقيت الشرق عدالي النجوم ** وعدا اصباعنا عندي يكيد
وجيت نعد تقتلي النجوم ** نجم سهيل والنجم الفريد
وقابل كان من بخته مشوم **بين اقفاص والسيرة حديد
اخوتة سلموا قبلوا اللوم ** عليهم هضدوا الريم الشديد
وريت رهوط في الناس تعوم ** وقالوا بحرنا امواجه قوية
وريت الصقر خاطبلي البوم ** وقالوا دخلته اليوم العشية
عزي في العمر عديته رحيل ** غير الناس ما تدري عليا
***
نصف العمر عديته هقيق ** انبح الصوت من وصف القصيدة
درت الشعر في بالي رفيق ** نداوي بيه الاجراح العتيدة
شعر ذهب يتبارق بريق ** فيه الغاز ومعاني عديدة
لكن فاتني خلى طريق ** يحب الضحك والكلمة البليدة
كره الشعر وعشق النهيق ** وخلى حصان وركب الجريدة
حليلي وين تنلاقي رفيق ** يخش القلب وينظف وريدة
غاب المي وحضر الدقيق ** بلاشي مي ما تجيشي العصيدة
واللي يعصدوا للهم سحيق ** لاش يعصدوا يديروا قلية
يغزوا غز مصهود وحريق ** والغزان يبدوه العشية
عزي في العمر عديتة رحيل ** غير الناس ما تدري عليا
***
