الجزء الثاني من الوصايا : وصية اب لابنه

الجزء الثاني من الوصايا : وصية اب لابنه
تقول كلماتها:

هداك ربي وشريــــــت جمــــــل واوخيـــــــــــــك ربي يهـــــــــــديه

انت بعت قيمــــــــنا الــــــــــكل وهو يشــــــــــــــــري اللي شاهيه

وخيك مـــــــــــــــاهو دار جمل وهاذاكــــــــــــــــــــــه مالدنيا بايه

وانت وليدي فيــــــــــــــك اندل خلي نعيـــــــــــــــــشوا الكل خزايا

دير الـــــــــــــــــــغربي لك مثل وديره قــــــــــــــــــدوه لك وغايه

تبعله خطـــــــــــــــــــواته الكل ومهما يعمـــــــــــــــــــل تبع رايه

وادخل بين سطــــــــــــور الذل تعرى كيف النـــــــــــــــاس عرايا

ميع اسيـــــــــــــــــب زيد انحل وارفع للمـــــــــــــــــــــطور راية

باش يقولو فـــــــــــــلان وصل ويقولوا في المــــــــــــــوضه آيه

خلي ســـــــــــــــــروالك ناصل كل تطبيسه تجرى حـــــــــــــكايه

خله يصبــــــــــــــح في المعقل وجيوبه عد بلا نهــــــــــــــايـــــه

هذا تشوفـــــــــــــــه تقول انبل وهذا تحلف فيه طوايـــــــــــــــــا

وهذا سروال مـــــــــــــــــدوبل ملهوفه عليه الشرايــــــــــــــــــه

وهذا سروال امـــــــــــــــــــزل تحلف جريت فيه جنايـــــــــــــــه

لمد مالخـــــــــــــــــــيرات الكل مالي لشكون مخبــــيــــــــــــــــه

وادهن وجهك وتكـــــــــــــــحل وافاحـــــــــــــــك مالغالي اشريه

درجه درجه مع التـــــــــــطوير لن نفوتوا كل حــــــــــــــــــــدود

واسمع قولي يا غشــــــــــــــير اصغى مــــــــا عــــــــاد المجحود

مادامك ما زلت صغــــــــــــــير عيش عمرك من غــــــــير قيـــود

الناس منك يا كبدي تغــــــــــير وماهو المطور محسود

طفي الناس الكل وســـــــــــــير الناس جمله من داخل سود

ولا تهمك ولدي مخاســــــــــير بمالي للحجامه جود

شوف ولدي فنان خبــــــــــــير حجام صبيعاته " قود"

ينقش منك شي كبــــــــــــــــير يكون مخالف للموجود

مشطه فيها الناس تحـــــــــــير تخلي الذر عليك رجود

" الجال" اشري كان تقدر زير وقف شعرك عود بعود

منين تلفالي بتبختـــــــــــــــــير نحلف علراسك قنفود

وكيف تبدا قدامي تســــــــــــير وراسك ماللوطه مكرود

نقول امك يذكرها بخــــــــــــير جرتها في وحمها بيه

شافت مالقرود كثـــــــــــــــــير جي اليخذه للقرد شبيه

بالك ولدي ادير شــــــــــــــنب ووياك اللحيه اطولها

قول للحجام يرطــــــــــــــــــب ايدك لا شي يعطلها

واسمع ولدي كان تحــــــــــب يخليلك لحيه وجملها

ياخذ وقته مهما تعــــــــــــــب ولازم بالملي يفصلها

تقول قلم رصاص كتـــــــــــب خطوط على خدك نزلها

اصداغك فيها الللام ضـــــرب وحتى القليمه لزلها

وخلي فوق الراس مكـــــــــب يتقي علقفده يظللها

وديرلها "كرامات" جعـــــــب ووقف شعراتك وافتلها

وترشق ولدي وهيــــــــــــــب حجامه وياك تبدلها

سمحه واتاتك تعجــــــــــــــب باسم المارينز فصايلها

تقول سابل علراسك ضـــــــب واللي في وحمها تختولها

وزيد كانك يا وليدي تســـــــب وانواع الدين تجلجلها

ومنطق زي عسل يصـــــــــب البابا حذا ولده تقسيه

يقولوا ما يكسابش طــــــــــب وكل ضني يفخر والديه

ما يهمك ولدي في حــــــــــــد تبع ما جابت لقمار

وعندك حق قليبك فــــــــــــــد لازم تتبدل لفكار

شوف برامج فوت العــــــــــد واخرها سوبار ستار

واحفظ يا وليدي وقلــــــــــــد اماراتك ما فيها عار

البس ما شذ وما شــــــــــــرد تحرر وتخطى لسوار

مره كتيبه ومره عـــــــــــــدد ومره تصويره واشهار

وبالك ولدي تجهــــــــــــــــــد في معانيها لا تحتار

وبره راهي تحط ظ البــــــــــد منهو اللي تيلوم حمار

واشيك ولدي وانقـــــــــــــــد واجلب بجمالك لنظار

سلاسل في الرقبه واليــــــــد وودعه ومعاها تذكار

حكمة ربي جيت ولـــــــــــــد وما نقدر نلغي لقدار

لكن اسعى ولدي بجــــــــــــد شارك حوا هيله اشوار

عليك نقول الله وحــــــــــــــد ونرغث يا ربي تحميه

غزيل زينه فات الحـــــــــــــد نخاف من الصياده عليه

اخرج ولدي وتبخـــــــــــــــتر ارشق خطواتك بدلال

اثنى في الخطوه وانكــــــــــر ولا تحسب واحد في البال

واحفظ من جملة لفكــــــــــــر دير "الشمبو" عوض " الجال"

ينوب ربي وتصب مطـــــــــر تكشكش زي رغاوي جمال

وكون فايز ولدي عالـــــــــذر ياسر قدامك مازال

ولا كان تكمل تســــــــــــــــكر كل ليله تغدي بوبلال

وفي وجهك يا كبدي ســـــــــر اطليه وغيرله الحال

خلي يولي لونه يســـــــــــــــر والبنوت يمكنها هبال

ولاه حرام تكون ذكـــــــــــــــر عالميكياج يهون المال

العالم يا ناس اطـــــــــــــــــور ذكر وانثى والفارق زال

عدي الليل الكل سهـــــــــــــــر حاذي رجال وحاذي انذال

وتمشى في دروب الشــــــــــر ولا تقدر عم ولا خال

تحدى يا كبدي وعبـــــــــــــــر واعمل كل اللي تبغيه

وقول للعالم جمـــــــــــله"طر" ودينك مالقاموس الغيه

دير وليدي سماعـــــــــــــــات وكثر مالغربي والراي

وهز رويسك عالنغمــــــــــات ولا تقولش لعباد حذاي

وكمل في اللوحه النقشــــــات وفي للسيقارو الباي

وكان لامك بعض الحصــــلات قول مسرحلي بباي

وبدل ولدي هالكلمـــــــــــــات عوض اهلا تنقولو "هاي"

وعوض اشنهو نقولو"وات" ووبدل عالخير ب"بيباي"

واحفظ مسرب لنترنــــــــــات وحاذر وابنادم خطاي

ودير صحبه واحكي عالشات ولمد من غادي ومناي

وشوف اخر هالتطليعــــــــات وقلد كان الناس ال"هاي"

وتبع اخر هالصيحــــــــــــات وغير رايك ما تاخذ راي

وكل موضه في البوتيكــــــات كون ولدي اول شراي

وكثر ولدي كلمة هــــــــــــات انت ماشي وانت جاي

وكان بخلوا بالدينـــــــــــارات دير قرنب وتعلق فيه

وارتع كان الشايب مــــــــــات ايتيم منهو يلوم عليه

وليدي جيلك ماهو عيـــــــــبه العيب الكله في الوالدين

جيل وجريت فيه غريـــــــــبه لاهو يسار ولاهو ايمين

وكيف نلقوا لهالجيل طبيــــبه داه واعر خايب ومكين

بدي البابا ما عنده هيـــــــــبه لم فيه تصحح في العين

يخرجها فلوسه من جيـــــــبه ويركب علروحه الدين

باش لبشر يشري مطاليـــــبه افاحات ودخله ودجين

يجري ويعاني مكاتيـــــــــــبه باش يرضوا عليه الغاضبين

وهو متغلف بالطــــــــــــــيبه يصلي في صلاته صلاتين

ولده فيده الشي يجـــــــــــيبه لا يحير ولا يقول منين

يخرج ويطول في الغيــــــــبه لا يقلق لا ينشد وين

حاله يا لخوان عجـــــــــــيبه نعيشوا فيها لنا سنين

تمدنا ودفعنا ضريــــــــــــــبه زهدناها قيمنا والدين

الشايب موش مقدر شيــــــبه كان تكلم بينه بين

ياكل لمنقى بالويــــــــــــــــبه بخته ساقه لشياطين

واللي كانت قبل هزيــــــــــبه صارت عادي بعد الفين

يخذنا وجريت فينا مصيـــــبه ذكوره يخذت ونساوين

جيل ما يعيبش العيــــــــــــبه وهمه كانش في شهاويه

كيف تطمع تيرد سليــــــــــبه العيب فيك اللي طامع فيه

رضا عبداللطيف 25-07-2008