الجزء الثالث من الوصايا : وصية اب لابنته

الجزء الثالث من الوصايا : وصية اب لابنته تقول كلماتها :

لاه كان الذر تغيرتوا البنوت للها باي كبير

كان انتو شبر اطورتوا هن غرقن في التطوير

*****************

بالك بنتي لا يفوتوك عصر السرعه عيشي فيه

أصغي بنتي نصايح بوك كلامي في وذنك ديريه

فوتي في التطور خوك مسرحلك غير فوزي عليه

سيري شقي تحدي الشوك دوسيه الماضي وانسيه

وكان اللوامه لاموك قولي عمري ونفرح بيه

خايف بالعين يطقوك زولك كان ربي يحميه

وكل مره ديري " نيو لوك" اخيه على التقليدي اخيه

وهوينه بنتي نعتوك قدك " لجيستي " يواتيه

دجين غالي لكن محكوك زي بيه البغلي خدمتيه

يزيد يغلى كانه مشروك تحلف فار تمتع فيه

خلي كل اللي يشوفوك ترقى فيهم نار سعير

اشري ونقولك مبروك برد قلبي ما عدت نغير

************

بالك تصغي كلام عزوز جدتك بنتي عديمة ذوق

لباس لكله اليوم يجوز " فونت" وعريه والمحزوق

ونحبه لباسك مفروز اغلى ما ثمه في السوق

يكون على بدنك مطروز منه تطير خفاف الروق

جيب من اجنابه محفوز يتماوج لوطه ولفوق

و" بودي "مشحط مكنوز منه الدنيا الكل اتوق

ويبدا من لوطه مهزوز شوف خلقي ولا مشقوق

فيك تبدا العيون تحوز خطر انت علمنهو يسوق

لباس الكله اليوم كنوز غير ثمش فنان يذوق

ويبدوا يمشوا زوز بزوز على بعضهم قاتلهم شوق

بنتي ماهو ثمر الموز سمح ولكن عمره قصير

انت كي الفعل المهموز فيه حروف فلمر اطير

************

كل حي يعاني في هوله وما صدقنا الحمل يخف

كانت ها لمه مهبوله وياسر كانت تتكلف

قماش خساير هكه طوله وتلفه لف على لف

اليوم هاهي حكايه محلوله فتنا الجيل المتخلف

الخياط ذراع تجيبهوله يعيى يفصل ويصنف

موضه تلبسها الدلوله جيب "دوبل فاي" مكلف

والوان قبيحه مجهوله اللي بدعها شاطر ومهف

تحلف سرفيته مغسوله تكرب حالتها وتشف

و"جسكور" وهلعه محلوله ام بريص عليها "تف"

وراسك نايض زي الغوله تقدي تحكي بيه سقف

فيكن يحكم كان المولى الشايب ولى زي صغير

منكن طاح من اول جوله روح ينفخ زي الكير

**************

اشري بنتي كل انواع " سن مونش" معاه " بريتال"

عادي بنتي شي وشاع وما اديري واحد في البال

اليوم لبست وبان ذراع غدوه يبان اللي مازال

لبس الكله ولى ارباع الكتان نطنه بدي فال

وشوفوا يا عالم لبداع ما اقصر تبغيله مال

اطورنا من غير صراع وبدل ربي حال بحال

بنتي لا عراك ولا فراع اني راني نشجع لجيال

خشي ثقافة هالفقاع سور الحشمه الكله زال

وبره رانا نباتوا جياع وراس بنتي تعيشي في دلال

اني فاهم من غير اقناع هاك بنتي واشري جوال

كان ضعت معاك الضياع وكان رجعت خير كثير

وديمه تتبدل لطباع وكل يوم نشوفوا تغيير

***************

هوني عليه الدينارات " بورتابل " مالنوع الغالي

وبره رهاو بالميات عليك بنتي ما ندسش مالي

اني قوليلي بابا (هات) ولمك قولي برحمة خالي

وصبيله هيله نغمات هيفاء وروبي ونانسي وسالي

وخالفيله بنتي الرنات وديري كل نغمه بامالي

هذي العيله والصاحبات وهذا لرقم اللي في بالي

ورد بالك م"الميساجات" امحي اللي يوصل طوالي

توقعش بعض الكبسات بدت حلوه وتنتن من تالي

ورد بالك مالبورتابلات ولا تكوني من النوع الفالي

وخوذي حذرك ماللمات " لبلوتوث" حباله طوالي

تشدي تحكي بالساعات مقوى صبرك فيه نحير

لا تربح ل"لبونيسات" لقيت فيها الذر الخير

******************

شوفي بنتي " البارابول" يدلك راهو علي ثم

يقريك الموضه على اصول وما يهمكش في اللي يذم

وخلي نعيشوا ديمه ذيول اتاخذنا يعطينا هم

عيشي عمرك عرض وطول بوك راضي واشبيه العم

وكثر بنتي مالدلول واللي ادور فيه يتم

وتغنج يا سمح الزول حتى اللي ما يشوف يشم

اكعاب تقول نعال خيول كيف بيها الخطوه تسقم

وجيب على شيره محلول تقول هتكوا جنبه بجلم

وايسامي بدعها مهبول يتعب فيها حتى الفم

يغدي فيها علي القول يحبلها ورقه وقلم

وديري مالمكياج سطول واحد دهن وواحد جير

ساعه وتشبح وجه قبول تقول مسمح وجه الخنزير

*****************

شعرك والمكياج حكايه كان الحجامه تريقلها

وكل واحد يخدم بدرايه اطيعه الخدمه ويذللها

بدت الدنيا الكل قرايه الواحد بالخبره يكملها

وكل واحد يلبس ع" لتايه" وكسوه علذوقه يفصلها

الحجامه اختاريها غايه تريقل شعراتك تعدلها

تصنع منك بنتي آيه تبدل هالخلقه تجملها

غوفه لكانت قبل طوايا تنفشها ولا تسبلها

تغاضي علقول الهزايه وخليها تنعم بجهلها

عليك ضحكه زي صوت حدايه تروع الصغرات تجفلها

واثني زي الحربايه قات جدتك وجه يخملها

وعدي وقتك علمرايه كحل وروج ومونيكير

نحبك ما تساويك صبايا ديري مللوان كثير

******************

يعيش وياما يشوف الحي الدنيا حبل على الجراره

دخلت وما عقبت شي من الكريطه للطياره

ادربت ولبست الزي توظفت في كل وزاره

تقويت والشان علي حانكت السوق وتجاره

تنافستوا والسوق حمي والراجل صوب دولاره

وقد ما نحكي وباقي شوي وادك زايد في تياره

اساووا جمله هو وهي زي عزيزه زي عماره

واساوت هيفاء بعلي اساووا والعنوان حضاره

خوفي كان نهار يجي نشوفك في البطحه زكاره

ولا نلقى البغلي طري وجارك تبنيله في دياره

يا حسره منين كان وصي وكنت وليه عليك يحير

اليوم ولى مسكين ولي لابد في ظل التطوير

*****************

ياسر يا بنتي عددنا وخلطناها لهو وجد

لكن في الحق تبغددنا حال اتخذ فات الحد

ياسر مارينا وقلدنا غصن عروبتنا اجرد

وياما مالتقليد حصدنا وحسب الزريعه تحصد

راحت في قشور صواردنا فلوس تفيت فوت العد

بيها يا وخياني جدنا شيخات ولبسه وقرد

قالوا حضاره فيها زدنا وقفنا للهم ند لند

عشنا وشخنا وتفرهدنا سراب وما تلقى ما تشد

قبل على المعموره سدنا وقفنا ضد الغازي سد

وحفظنا كنز عوايدنا الذر على البابا على الجد

ولا غير الرحمان عبدنا صمدنا ما جرفناش المد

وتو تركنا المعنى وحدنا وشدينا في طياح البد

ابليس التطوير اصيدنا ويحيى سافر واسقد

والوهم مداين شيدنا رفعناها من غير عمد

ركعنا طاوعنا سيدنا واللي يقول يصير يصير

عطيناه الحبل وقيدنا كسرنا وما عادش تجبير

*****************

انت وليدي درت جمل وانت ولدي بكيفك سير

وانت بنتي طفي الكل حره بنتي مهما يصير

منكم ظني مخي انشل تايه ما عارف تدبير

قعدلي شعري فيه نهل وكان ربي يختمها بخير

رضا عبداللطيف

07 جويلية

2008