vendredi 4 juillet 2008

البَاهِــــــــي فِي لَيَّــــــــام: الشاعر الشعبي الطاهر تليش

البَاهِــــــــــــــــــــي فِي لَيَّـــــــــــــــــــــــــام


كلمات الشاعر الشعبي: الطاهر تليش


البَاهِي فِي لَيّام ترَبِّي--- تَمْلاَ وتعَبِّي--- يجِي يُوم وتِكْشِف لِمْخَبِّي:
البَاهِي فِي لَيَّام تقرِّي--- تَنْصَحْ وتْوَرِّي--- تِجْلِي لِمْصَدِّي وتْغَرِّي
تِجْرِي معَ لِيِجْرِِي وتْجَرِّي--- تِكْسِي وتْعَرِّي--- تِكْشِفْ عالّي كَامِن سِرِّي
تشري بالجُمْلة وتْشرِّي--- تُنصُب لِلْبِرِّي--- يَحْصَل لِي ساري ومْسرّي
نفْسي فيك نْكلِّم فُرّي --- بِيّا ما تْغُرّي--- خايف َتَبْدي زيّه تْكِرّي
كولي كان الحِل ودُرّي--- نَقِّي وتحَرّي--- رُدّي حق النّاس وقِرّّي
هِزّي جْلالِك وأنتِ تُجُرّي--- قِدّيه وصُرّي--- صُفّيه المِنْداف وبَرّي
تلْقي كلاب لْتنْبحْ زُرّي--- كان هُربُوا مُرّي--- وكان عَضُّوا عَضِّيهم ضُرّي
كان فزعوا الجَوّي والبَرّي--- قُرّي لي تقُرّي--- بالسّكّين ولاَخرْ ذَرّي
دَاوي بالدّرْياق وغُرّي--- للواطي كُرّي--- صُبّي عليهم حامي شُرّي
شِدّي رُوحِك ما تطَّرّي--- إبْري وتبَرّي--- كلاب لْتُقعُد حَيّه تْجَرّي
دِيري حْسابِك كِي تظطرّي--- لْيا نْتانت فرّي--- طيري شور الجنّه شِبّي
حلّيته صَرّي --- شِدي راس الخيط ودِبي.


الباهي في ليّام تْربّي--- تملا وتعبّي --- يْجي يُوم وتِكشف لِمْخَبّي:
شِدّي راس الخِيط وسَدّي--- فلِيج لْمَا يعَدّي--- حرام النِّعمه تحته تْنَدّي
صَبّتْ مِدّي الخطوه مدّي--- نزرع من يدّي- خط يجيب وخط يُوَدّي
وصلْتي راس المَرْجع رُدّي--- عارفاته حدّي--- تفُوتي يبْدا يِقْلِب ضدّي
تعِبْتي يالِبْسرعه تفِدّي--- بعد لتتغدّي--- إتَّكِّي شدّي السّبحه وعِدّي
زعمه نغامر زعمه تقدّي --- الشيطان تْصُدّي--- ما نَبْدَا نُلْطُم في خدّي
ديري خِطّه لِعْبِك هَدّي- ليا وُصلِك هِدّي- وقولي قبِلْناه التحدّي
قصّيله جنحانه حِدّي--- خلّيه يردّي--- قوليله ماكش من نِدّي
قصير وزير وماكش قدّي--- كان سبِّك رُدّي--- وكانه شدّ خناقِك شدّي
مايْتوبِش ملعون اللّدّي--- حل فمّه سِدّي--- حْصُل الدّاله يلزم يِِدّي
فرصه جت وْراك تعَدّي --- هو المِتْعدّي--- يتْفولحْ واقِفْ مصّدّي
فُزتي يرحم بوك وجِدّي--- تِجري وتكِدّي--- ولاكن ماتخافيش بربّي
واللهِ بوِدّي--- الناس الكلّ إتّوب تلبّي.

الباهي في ليّام تربّي--- تملا وتعبّي--- يجي يوم وتِكشِف لِمخبّي:
بْوِدّي النّاس الكل إتّوب--- يغْسلْنا شْبُوب--- ورَقنا وعَتَقنا والكُوب
يْجي سِيل الّي يرُخْ الطّوب--- شماله وجنوب--- وشَرقه وغَربَه يجيه النّوب
يعود حَقّْ النّاس المسلوب--- وِرزق المخنوب--- لْكان غالِب يبدَى مَغلوب
البوليس السرّي والبُوب --- ولاَحَدْ مَرعوب--- ولا دَم ولا ثمَّه حْروب
يستَغنَى الفقري والمنكوب--- لْجيبه منقوب--- يُكرُب في جِلدَه المكروب
ومِلك الدّولة لّي مَنهوب--- خلاف المحسوب --- يعَبّي ويمسح في شَيبوب
ناس حْلاوِلْها الملعوب--- باطل مَرتوب--- ويَمْلا ويفرّغ حَربوب
ربّي يخفّف هَا المَكتوب--- يَطفَى الخَشنوب--- ويِتّكّى شوم العَرقوب
يجي يوم ويبْدا مطلوب--- قدّام شعوب--- يضَل سيف العادل مَنصوب
يجي الخير ويبدَى مَصبوب--- يزيد المَنسوب--- ويمشي الجّاير بوجَرْعوب
تسْلَمْ تونس من لعْيوب--- ترَابي المَحبوب--- وهِبّي يا حرّيّة هِبّي
تَصفَى لقلوب--- منِين الباطل يَبدا مْهَبّي.
البَاهي في لَيّام تربّي--- تمْلا

المصدر: السبيل أونلاين، بتاريخ 16 جوان 2008